Rhwng Dau Feddwl

Merch o Gwm Rhondda yw Christine James, ac er ei bod yn byw yn yr Eglwys Newydd, Caerdydd, ers dros bymtheng mlynedd ar hugain, mae ei gwreiddiau’n ddwfn yn y cwm hwnnw. Cyn iddi ymddeol yn 2017 roedd yn Athro ac yn Bennaeth Adran y Gymraeg ym Mhrifysgol Abertawe, lle y bu’n darlithio’n bennaf ar lenyddiaeth Gymraeg yr Oesoedd Canol ac ar lenyddiaeth Cymoedd y De. Christine oedd y fenyw gyntaf i’w gorseddu’n Archdderwydd Cymru, a hi hefyd yw’r fenyw gyntaf i fod yn Gofiadur yr Orsedd. Ei magwraeth, ei diddordeb mawr yn iaith a hanes a thraddodiadau ein cenedl, ynghyd â’i theulu a’i ffydd Gristnogol bersonol, yw’r edau sy’n gwau trwy’r gyfrol hon, ei hail gasgliad o gerddi. Enillodd ei chasgliad cyntaf, rhwng y llinellau (Cyhoeddiadau Barddas, 2013) y categori ‘Barddoniaeth’ yng nghystadleuaeth Llyfr y Flwyddyn 2014.

Mae Christine James yn adnabyddus am ei cherddi ecffrastig disglair ac mi fydd ei hail gyfrol, rhwng dau feddwl (2024), llawn amrediad diddorol o farddoniaeth a chelf. Mae celf yn ysbrydoliaeth i Christine ac yn ei sbarduno i archwilio themâu megis teulu, pobl, adnabod yr hunan, ffydd a chred. Crisialwyd ei chrefft fel bardd yng ngeiriau Derec Llwyd Owen:“[Mae] gan Christine ddawn gywrain i lunio troadau ymadrodd disglair mor ddiffwdan, ac i fydru mor rhythmig.”