Sarlavhalarning lisoniy xususiyatlari

Axborot oqimi nihoyatda kuchaygan bugungi kunda jurnalistdan eng avvalo materialga shoshilinch ishlov berish va uni tezkorlik bilan tarqatish talab etiladi, shunday bo'lsa ham, birinchi galda yaxshi mazmunga ega bo'lgan publitsistik matnlarga ehtiyoj hamisha katta. Yaxshi publitsistik matn yaratilishi uchun esa matnga mos sarlavha tanlash ham g'oyatda muhim. OAVda janrlar imkoniyatlaridan keng foydalanish, materiallarning mazmun-mundarijasini boyitish, axborotlarning ta'sirchanligini oshirish sohalarida katta ijobiy o'zgarishlar yuz berdi. Publitsistik matnlar va reklamalar sarlavhalarining o'ziga xosligini ta'minlashga, ularning reklamaliligini oshirishga xizmat qiluvchi til vositalaridan foydalanishga e'tibor kuchaydi. Qolaversa, internet jurnalistikasining keng miqyosda rivojlanganligi internet nashrlar tilini lingvistik jihatdan tadqiq etish vazifasini yuklaydi. Monografiyada internet nashrlarda e'lon qilingan publitsistik matnlar va reklamalar sarlavhalarining lingvistik xususiyatlari tadqiq etilgan.