Masa e Besimit

Uroj që secili prej jush të arrijë të zotërojë besimin e të gjitha masave shpirtërore dhe të gëzojë lavdinë e përjetshme hyjnore në Jerusalemin e Ri në të cilin ndodhet froni i Perëndisë.

Botimi i fundit i publikuar Mesazhi i Kryqit, së bashku me botimin Masa e Besimit paraqesin themelin më të rëndësishëm për të jetuar një jetë të denjë të krishterë. Falënderoj dhe lavdëroj Atin Perëndi, i cili bekoi botimin e kësaj pune të çmueshme dhe bëri që mbretëria t’u zbulohej njerëzve të panumërt.

Sot, ka shumë njerëz që pohojnë se besojnë por nuk janë të sigurt për shpëtimin e tyre. Ata nuk e njohin masën e hirit dhe nuk e dinë se sa shumë hir duhet të kenë pranuar për të marrë shpëtimin. Njerëzit i thonë njëri-tjetrit “Ky njeri ka shumë besim” ose “Ky tjetri ka shumë pak besim.” Megjithatë, nuk është e lehtë të dish se sa pret Zoti nga besimi yt ose të masësh sa i madh është besimi apo sa është rritur. Zoti nuk do që ne të kemi besim mishëror por besim shpirtëror të shoqëruar nga vepra. Njerëzve u është thënë të kenë besim mishëror duke dëgjuar e mësuar fjalën e Perëndisë, duke e memorizuar dhe duke e mbajtur atë si dije. Me vullnetin tonë ne nuk mund të arrijmë të kemi besim shpirtëror; por ky besim mund të arrihet vetëm nëpërmjet Perëndisë.

Prandaj Romakëve 12:3 na nxit, “Sepse, për hirin që më është dhënë, unë i them secilit prej jush të mos e vlerësojë veten më shumë se sa duhet ta çmojë, por të ketë një vlerësim të përkorë, sipas masës së besimit që Perëndia i ndau secilit.” Ky varg na tregon se besimi shpirtëror i çdo personi është i dhënë nga Perëndia dhe përgjigjet e bekimet e Tij ndryshojnë në varësi të masës së besimit të çdo njeriu.

1 Gjonit 2:12 dhe vargjet e mëposhtme e përshkruajnë rritjen e besimit të një të krishteri sipas hapave të besimit të një foshnje, fëmije, të një të riu dhe të etërve. Tek e 1 Korintasve 15:41 lexojmë, “Tjetër është lavdia e diellit dhe tjetër lavdia e hënës dhe tjetër lavdia e yjeve; sepse ndryshon në lavdi ylli nga ylli.” ...